యిప్లవం పిలిసింది -- రా !

యిప్లవం యాడుందిరా

ఆడనే నీ కూడుందిరా నీ గూడిందిరా

గోడు గొడున ఏడస్తవుంటే

యాడు నీవంక రాడింకరా

యిప్లవం యాడుందిరా -- నీ

గుండెలోనే కూకుందిరా -- మన

కళ్లలోనే దాగుందిరా

ఓరయ్యో సేద్యగాడా

అయ్యయ్యో బానిసీడ

యెన్నాళ్లు చాకిరీ

యెన్నేళ్లు నౌకిరీ

నిన్నేలే దొరగాడు

ఆడొక్క   పోకిరీ

నీ చెమట పిండీ

నీ బతుకు నుండీ

రూపాయలే గుంజుకుంటాడు -- అవి

రాకుంటే తెగ గింజుకొంటాడు –నిన్ను

అప్పుల్లో ముంచి

వడ్డీలు పెంచి

నీ కొండ్రనే నంజుకుంటాడు

ఏంది దొరా యీ గోరం

ఏందని అడిగావంటే 

బూటుతో కొడతాడు

బూతులు తిడతాడు

ఆస్తి కరిగి కస్తి పెరిగి

చస్తావుంటే పైకం

తెస్తావా తెమ్మంటాడు – లేదా నీ

పెళ్లాన్నే రమ్మంటాడు -- కాదా నీ

కూతుర్నే యిమ్మంటాడు -- అలాంటోణ్ణి

గొడ్డళ్లతో నరకాలిరా

కొడవళ్ళతో తరగాలిరా

యిప్లవం పిలిసింది --  రా !

                       శ్రీశ్రీ - మరోప్రస్థానం