అరెరే దమ్మిడీ దొరికింది
దాన్తో యేమిటి చేస్తావు ?
దీన్తో పలక కొంటాను
నాకో బలపం కొంటాను
ఇంకా ఏమిటి కొంటావు ?
నేనో రెక్కల ఏనుగు కొంటాను
గజ్జల గుర్రం కొంటాను
ఇంకా ఏమిటి కొంటావు ?
అక్కడ రాజుగారి కూతుర్నే కొనేస్తాను
ఆమెను నా సంతలో పడేస్తాను
తాళిబొట్టు మూడుసార్లు ముడేస్తాను
ఆ తర్వాత ?
ఏనుగు మీద ఆకాశంలో
ఇద్దరం షికార్లు చేస్తాము
ఓరోరి యెర్రి నాయనా
యెంతసేపూ సొంత గొడవేనా ?
ఈ ప్రపంచం కోసం
ఏమైనా చెయ్యలేవు ?
ఊ ! ఎందుకు చెయ్యలేను
విలువైనది నా దమ్మిడీ
వెలకందనిది నా దమ్మిడీ
దీంతో బాంబులు కొంటాను
దీంతో చాకులు కొంటాను తు
పాకులు కొంటాను
దీంతో టాంకులు కొంటాను
దీంతో విమానాలు కొంటాను
అన్నీ పేదో ళ్ళకి పంచి పెడతాను
లేనోళ్ళకి పంచిపెడతాను
కూలీలకి సరఫరా చేస్తాను
రైతోళ్ళకి సరఫరా చేస్తాను
చేసి ?
ప్రజా సేవ నిర్మిస్తాను
ప్రజా యుద్ధం ప్రకటిస్తాను
పేదలతో సాదలతో
చిన్నలతో పెద్దలతో
కూలోళ్లతో రైతోళ్లతో
సేనలోన నేనూ ఒక
సిపాయి నవుతాను
లడాయి చేస్తాను
ఎర్రకోట రగిలిస్తాను
ఎర్రజండా ఎగరేస్తాను
అన్యాయాలు హతమారుస్తాము
అక్రమాలు పరిమారుస్తాము
ఈ ప్రపంచాన్ని మారుస్తాం
పరిపాలిస్తాం
సమసమాజమే రూపొందిస్తాము
నవసమాజమే మీకందిస్తాము
మహాకవి శ్రీశ్రీ -- మరో ప్రస్థానం
0 comments:
Post a Comment