తెల్లవాళ్లు ఇండియాకు
మేళ్ళెన్నో చేశారని
చిన్నప్పుడు స్కూళ్ళల్లో
ఎన్ని చదువలేదు మనం !
సహగమనం ఆ పేరు
ధగ్గీ పరిమార్చారు
రైళ్లు టెలి గ్రాఫులు
వంతెనలు చాలా వేశారు
ఔను వాళ్ళు చాల మేల్లు
చేయకపోలేదు నిజం !
అయినా ఆ దొరతనాన్ని
అసహ్యించుకొన్నాం కద !
అన్నీ చేసినా కూడా
తెల్లదొరల నందర్నీ
గెంటేశాం కద !
కంటికి నిదరొచ్చిందా ?
అదే రీతిగా నేడు
పాలకవర్గం చేసిన
చేస్తున్న సమస్తాన్ని
చూస్తూనే వుంది జనం
సమకాలిక పరిపాలక
చర్యలు సర్కారువారి
ప్రచార సాధనాలతో
ప్రాచుర్యం పొందెను కద !
ఇన్ని జరుగుచున్న , మన
హీనస్థితి మారదు కదా !
ధనశక్తులతో బాటే
దారిద్యం పెరిగెను కద !
అమ్మడమూ కొనడమనే
ఈ పద్ధతి కన్నా ఒక
మంచి వ్యవస్థను చేరే
మార్గమనుసరించాలి
సమసమాజ నిర్మాణం
స్వప్నం కాదీనాడు
మన యెదుటే ఈ లోకం
మారుతోంది క్షణ క్షణం
తూర్పు దిక్కు మార్పు చెంది
ఎరుపెక్కిందీనాడు
సామ్యవాదమే ప్రపంచ
శక్తియైనదీనాడు
మహాకవి శ్రీశ్రీ -మరోప్రస్థానం
0 comments:
Post a Comment