ఒక మనిషిని పదిపిల్లలుగా
చీల్చే ఆగ్రహం
పదిపిల్లల్ని నూరుపువ్వులుగా
కూర్చే ఆగ్రహం
నూరు పువ్వుల్ని వెయ్యి కత్తులుగా
మార్చే ఆగ్రహం
పేదవాళ్ళ ఆగ్రహం
రెండు అగ్ని పర్వతాల యెదట
ఒక భూకంపాన్ని నిలబెడుతుంది
వంద డొక్కల్ని ఒక రెక్కగా
మార్చే ఆగ్రహం
వెయ్యి రెక్కల్ని ఒక చుక్కగా
చేర్చే ఆగ్రహం
లక్షచుక్కల్ని ఒక పాటగా
పేర్చే ఆగ్రహం
పేదవాళ్ళ ఆగ్రహం
రెండు పోలీసు టోపీల యెదట
ఈ గీతాన్ని నిలబెడుతుంది
మహాకవి శ్రీశ్రీ - మరో ప్రస్థానం
0 comments:
Post a Comment