విజయ దుంధుభి

శ్రీఖరనామ  సంవత్సరమిది   

విజయదుంధుభి మ్రోగించుదాం  

విప్లవ శంఖం పూరించుదాం

విజయం దేనిపై  

విప్లవం ఎందుకని  ?

అవిచ్చిన్నంగా సాగుతున్న అవినీతిపై విజయం  అసందర్భంగా  రేగుతున్న అధర్మాలపై విప్లవం 

ఆనాడు  

అరవై ఏళ్ల క్రిందట 

పారతంత్ర్యాన్ని  పారద్రోలాడానికి  

బానిస సంకెళ్ళను  బద్ధలు చెయ్యడానికి  

ప్రతిఘటన సమరం సాగింది

ఈనాడు 

పారదోలడానికి  పరాయివాళ్లు లేరు  

అవినీతిపరులంతా  

అక్రమాలతో విక్రమిస్తున్న వాళ్ళంతా

అన్యాయాల  పెట్టుబడితో  

అధిక లాభాలు గుంజుకుంటున్న వాళ్ళంతా  

సరాసరి  మన శిరస్సుల మీదనే  

శివతాండవం  చేస్తున్న వాళ్ళంతా  

                            మనవాళ్లే

ఎక్కడున్నారు వీళ్ళు  

ఇందుగలరందు  లేరని 

సందేహం అక్కరలేని  

సర్వాంతర్యాములు వీళ్ళు  

సాపాటు  రాములు గాళ్ళు

ఈ రాముళ్ళ  మారాముళ్ల  

ముళ్ళ  పొదల నుండి  

బైటపడడం ఎలా సాధ్యం ? 

అందుకొకటే  మార్గం 

 ఈ వ్యక్తులెవరూ  మన 

          అసలు శత్రువులు కారు  

వీరు బోరువిరుచుకొని  

బయలుదేరుతున్న  

బ్రష్టువ్యవస్థ   అంటే అదే మన 

                 ప్రథమ శత్రువు  

                 ప్రధాన శత్రువు  

అదే అవస్థల కన్నిటికీ  

కారణ భూతమైన  

పెట్టుబడిదారీ వ్యవస్థ  

దాని మీదనే మన పోరాటం  

దానిని పడగొట్టడానికే మన విప్లవం

ఇంతకూ పెట్టుబడి 

అంటే ఏమిటి  ?

రూపాయలా , రూబుల్సా , 

డాలర్లా డాయిష్  మార్కులా

కావు ఇవి  పెట్టుబడి కావు  

వెండి బంగారాలు 

పెట్టుబడి కావు  

బర్రెలూ గోవులూ  

పందులూ గొర్రెలూ 

ఇవేవీ కావు పెట్టుబడి

మానవుల సామూహిక  శ్రమ శక్తి  

మాత్రమే నిజమైన ధనశక్తి 

ఈ శ్రమశక్తిని  

రంగురంగుల  రకరకాల వేషాలతో  

దోచుకొంటున్నదే  ఈనాటి 

అంతర్జాతీయ  ధనస్వామ్య వ్యవస్థ  

దీని మీదనే ఎత్తుతున్నాం  మన 

తిరుగుబాటు  జెండా  

దుంధుభి మ్రోగిస్తున్నాం ఈ 

తిరుగుబాటు విజయం కోసమే

మానవత్వాన్ని మించిన మతం 

నాకు లేదు  

మానవ శక్తినే విశ్వసిస్తాను

మానవాతీత శక్తుల మీద 

నాకు నమ్మకం లేదు  

మానవుడే నా మతం  

మానవత్వం   సమానత్వమే 

          నా గమ్యం

అది సాధించడానికే  

    పూరించాలి విప్లవశంఖం  

         మ్రోగించాలి విజయ దుంధుభి .

మహాకవి శ్రీశ్రీ  -  మరోప్రస్థానం